Мақола

Россиянинг Краснодар ўлкасида ўзбекистонлик 24 ёшли эркак ўз танишининг қотилига айлангани бўйича айблов юзасидан суд олдида жавоб беради, дея хабар қилди Kun.uz.

Россия Тергов қўмитасининг Краснодар ўлкаси бўйича тергов бошқармаси матбуот хизмати хабарига кўра, эркаклар Краснодар транспорт компаниясида ишлашган ҳамда корхона ҳудудида истиқомат қилишган. Терговга кўра, 2017 йилнинг 24 август куни кечқурун 24 ёшли айбланувчи маст ҳолатда бўлгани ҳолда, стол тенниси ўйнаётган 25 ёшли танишининг ёнига яқинлашган ва бирга ўйнашни таклиф қилган. Бироқ, қайд этилишича, у рад жавобини олган.

24 ёшли ўзбекистонлик эркакнинг бундан жаҳли чиққан ва у ватандошига пичоқ билан бир неча маротаба зарба берган. Гувоҳлар тиббий бригадани чақиртиришган, бироқ жабрланувчи «тез ёрдам» машинасида шифохонага олиб кетилаётган вақтда ҳаётдан кўз юмди.

Айни дамда жиноий иш тасдиқланган айблов хулосаси билан судга кўриб чиқиш учун юборилгани айтилмоқда.

Навигация